Дэ ди къалэныр…

Хэкум, ди зэманым и лIыхъужьхэм я гугъу щытщI махуэ хэIэтыкIам дыхуейт нэIуасэ фыхуэтщIыну адыгэ лъэпкъым и къуэ хахуэм.

КХЪУЭХЪУ Мусэ СулътIан и къуэр — «Россети Северный Кавказ»-«КарачаевоЧеркесскэнерго»-м и къудамэ Хьэбэз РЭС-м эксплуатацэмкIэ и инженерщ. Мусэ СВО-р щыщIидза япэ тхьэмахуэм зауэ операцэ хэхам хыхьауэ щытащ. Мазэ зыбжанэ нэхъ текIатэкъым Къэрэшей-Черкес Республикэм къегъэбыдылIа 34-нэ гвардейскэ мотострелковэ бригадэ хэхам щIыгъуу Херсон областым, и гуащIапIэм къыщыщыхутам.

Абы щегъэжьауэ, и узыншагъэкIэ зэуапIэм Iутыным темыгъэпсыхьауэ комиссэм къилъытэу къыхигъэкIыжыхункIэ, адыгэ щIалэм лIыгъэрэ псэемыблэжыныгъэрэ къигъэлъагъуэу, и псэзэпылъхьэпIэ, и вэржьэрыпIэ курыкупсэм хэту зэуапIэ зэхуэмыдэхэм Iутащ. Апхуэдэ лIыгъэм къыпэкIуащ зауэлI нагъыщэр: Суворов и цIэкIэ медалыр. ЩIыхь пылъу зауэлI къалэныр игъэзэщIащ адыгэлIым. И къуажэ къыдыхьэжа нэужьи, псэхуакъым, зэуэ лэжьыгъэм пэрыхьэжащ. ЖыIэпхъэщи, ар СВО-м хыхьэным ипэ къихуэу илъэсийкIэ энергокъудамэм оператору щылэжьагъэххэт.

Энергетическэ къудамэм Кхъуэхъур хыхьащ Къэрэшей-Черкес энергетическэ техникумыр «Электрические станции, сети и системы» IэщIагъэр иIэу къиуха нэужь. АбыкIи къэувыIакъым: щIыхьэжащ Невинномысск къэрал гуманитартехническэ институтым. Абдеж «Электроэнергетика и электротехника» IэщIагъэмкIэ ищхьэ щIэныгъэ зригъэгъуэтащ. ЩIыуэпс къэхъукъащIэхэм я лъэужьхэр зэгъэзэхуэжыным, жылагъуэм, унагъуэ къэс, къулыкъущIапIэ, IуэхущIапIэ дэтхэнэми уэздыгъэр, электрокъарур псынщIэу ялъэгъэIэсыжыным хуэунэтIа лэжьыгъэшхуэхэм, махуэ къэс зэфIаххэм къинэмыщIауэ, Кхъуэхъу Мусэ сыт щыгъуи хэтщ.

Иджы езым зыкъызэриумысыжщи, жэуаплыгъэ лъагэм епха къулыкъу уардэм зэрыщылэжьар СВО-м деж икъукIэ къыщыщхьэпэжащ, и лэжьыгъэм хуиIэ жэуаплыгъэри, гуащIэдэкI щэн-Iэдэбри сэбэп къыхуэхъуащ мызэ-мытIэу. 2025 гъэм зэуапIэм къикIыжри, мамыр гуащIэдэкIым хыхьэжащ Мусэ. И лэжьэкIэфIым, и цIыху хэтыкIэ екIум, адыгагъэм, цIыхугъэм еплъкIэрэ, Мусэ инженер IэнатIэр дзыхь къыхуащIащ. Иджы абы и нэIэм щIэтщ районым и участкищ. Ар мащIэрэ-куэдрэ къыбгурагъаIуэ мы бжы гъэхэм: Кхъуэхъу Мусэ зи пашэ гупым электрокъарур зрикIуэ кIапсэ километр 600-м, трансформатор 200-м нэсым я лэжьыгъэр зэпымыууэ къызэрагъэпэщ.

«Лэжьыгъэр жэуаплыгъэ хэхам, лъагэм епхащ, ауэ ди къалэнхэм дыпэлъэщынущ гуп зэгурыгъэIуауэ, зи IэщIагъэм хуэIэижь IэщIагъэлIхэу дызэгъэуIуащи. Иужьрейуэ гулъытэ нэхъыбэ зэдгъэгъуэтар, зэрыгурыIуэгъуэщи, щIымахуэ пIалъэм и къэхъукъащIэхэм я зэран жылагъуэм ямыкIын, ди нэIэм щIэт кIапсэ, оборудованэ, техникэ псори зэтедгъэпсыхьынращ. ДыхущIыхьащ, зэнэдгъэсащ Iуэхухэр», — жеIэ Мусэ.

Абы къикIыр аращи, районым щыщ, къегъэбыдылIа участкищым щыпсэу цIыху 35-м щIигъум электрокъарур лъэпощхьэпоуншэу янэIэсынущ. Апхуэдэ къабзэщ социальнэ IуэхущIапIэхэри. Мэлажьэ адыгэлIыр, зэуапIэр мамыр гуащIэдэкIкIэ ихъуэжами, и псэ емыблэжу. «ЗэуапIэм Iут ди щIалэхэм гукIи-псэкIи зыхащIэ ди гулъытэр, ди лэжьыгъэр. Абыхэм я зауэлI къалэнхэр пылъхьэншэу щагъэзащIэкIэ, дыхуиткъым дэри ди лэжьыгъэр къызыхуэтыншэу дымыщIэну», — аращ зэуапIэ нэщIэбжьэм ипсыхьа щIалэм и Iуэху еплъыкIэр.

ТУАРШЫ Ирэ