Бзэхэмрэ динхэмрэ ятеухуауэ

Iэдэмрэ Хьэуэрэ я бзэр

Мы тхыгъэр зытеухуа темэм илъэс куэд хъуауэ согупсыс, апщыгъуэми, сэ зыракъым абы зи Iур игъэгъущIэу, зи щхьэ щIыбыр игъэпщIантIэр, абы цIыху куэдым я «щхьэр егъэуз». Тхьэм япэу къигъэщIа цIыхухэр – Iэдэмрэ Хьэуэрэ, абыхэм я япэрей бынхэр сыт хуэдэбзэт зэрызэпсалъэр? Иджы чыристанхэм жаIэ ар Библиер япэу зэратха иврит журтыбзэрауэ, муслъымэнхэм – КъурIэныр зэрытха хьэрыпыбзэрауэ. А еплъыкIитIым дэтхэнэра нэхъ тэмэму къэплъытэ хъунур? ТIури дзыхьщIэгъукъым. Философ-эзотерикэ хэкIыпIэхэм, сэ сызэджахэм ящыщу Блаватская Еленэ и тхыгъэхэм къызэрагъэлъагъуэмкIэ, япэ дыдэу дунейм къытехьа бзэм зэреджэр сензарщ.

Ар дэ дызэса, дызэрызэпсалъэ, дызэрызэхуэтхэ бзэхэм яхуэдэкъым. Ар психоэнергетическэщ, нэгъуэщIу жыпIэмэ, ар псэ къарукIэ мэлажьэ. ЦIыхухэр макъи, псалъи, нагъыщи хэмыту, зохъуажэ я гупсысэхэмкIэ, я псэ къарумкIэ. ЦIыху узыншэр сымаджэм щIэупщIакIуэ хуэкIуэрэ бгъэдэсмэ, и псэ къарумкIэ догуашэри, нэхъыфI ещI е уеблэмэ егъэхъуж. Арагъэнщ, Тхьэм ирещIи, щIэупщIакIуэ кIуэнри къыщIрагъэжьар. Псалъэм и жыIэгъуэкIэ, атлантхэр (нартхэр) сензар бзэмкIэ зэгурыIуэу щытащ.

Ахэр псэлъэншэу, макъыншэу зэхъуажэт я гупсысэхэмкIэ, я гурылъхэмкIэ. Нартхэр а бзэмкIэ ягурыIуэт псэ зыIуту хъуам, псэущхьэхэм, къэкIыгъэхэм, щIыуэпсым и къарухэм, псыежэхым, губгъуэм, мэзым, мывэхэм, пшэхэм, вагъуэхэм. Апхуэдэ къабзэу, абыхэм лъэкIыныгъэ яIэт а бзэмкIэ Тхьэми зыхуагъэзэну. Сензарым къытекIыжауэ жаIэ тхыбзэ зыгъуэтыжа санскритыр. Ауэ санскритри иджы зыщIэр абы пылъ еджагъэшхуэхэм я закъуэщ. ПэжыпIэм ухуеймэ, псэ къарукIэ лажьэ сензарыр гъазэ имыIэу икIи лъэужьыншэу  кIуэдакъым. Ар иджыри къагуроIуэ сабийхэм. ИлъэсиплI-тху нэхъ мыхъуа нанухэм я щхьэ къупщхьэхэр иджыри здызэмыпцIа щхьэбгъупцIапцIэмкIэ пыщIэныгъэ хуаIэщ дыкъэзыухъуреихь щIыуэпсымрэ хьэршымрэ. Абыхэм я Iэпкълъэпкъ цIыкIухэм я дагъуэр, зэгуэзыгъэпыр, ягу иримыхьхэр фIы дыдэу яIуэтэф а пасэрей сензар бзэмкIэ.

Хэти гу лъитагъэнкIэ мэхъу сабий цIыкIур анэм хуэмыгъэувыIэу, гъуэгыу, «зичэтхъэжу». Анэм и щхьэм къитIэскъым сабиибзэмкIэ къыхуаIуэтэну зыхуейр, абы къыхэкIыу зыри зимылажьэ сабийм тогуауэ. Аращ сабийхэмрэ балигъхэмрэ куэдрэ щIызэгурымыIуэр, иужьрейхэм сыт хуэдизу Iущу зыкъамылъытэжми. Матвей къыбгъэдэкIа Евангелием мыпхуэдэу щыжыIащ: «Зыфхъуэжу, сабийхэм яхуэдэ фымыхъумэ, Тхьэм и уэгу пащхьэм фихьэнукъым». («Если не обратитесь и не будете, как дети, не войдёте в Царство Небесное»). НэгъуэщIу жыпIэмэ, абы къокI цIыхуцIэ зиIэр псалъи тхыбзи зыхэмыт психоэнергетическэ бзэм и гущэм къитэджыкIауэ, дяпэкIэ абы хуэкIуэжыпхъэу икIи хуэкIуэжыну. Тхьэр щызыкIэ, динхэр щхьэ куэд? Википедием зэритхымкIэ, дину дунейм тетыр белджылы щIыгъуафIэкъым, ауэ хэкIыпIэ гуэрхэм къызэрагъэлъагъуэм тетщIыхьмэ, динхэм я бжыгъэр 4000-м щIегъу. Абыхэм ящыщу нэхъыщхьэу ябж динитхур: индуизмыр, иудаизмыр, буддизмыр, чыристаныр, ислъамыр. Дэтхэнэ динми къелъытэ езым и гупсысэкIэмрэ дуней тетыкIэмрэ нэхъ тэрэзрэ нэхъ пэжрэ щымыIэу. Зэтехуэкъым абыхэм я тхьэ елъэIукIэри, диныр зэ рызэрахьэри. АтIэ, Тхьэм къигъэщIа япэрей цIыхухэм сыт хуэдэ дин зэрахьар? Iэдэмрэ Хьэуэрэ жэнэт жыг хадэм щисам дин яIакъым. Ахэр сыткIэ дин хуэныкъуэт, Тхьэр къабгъэдыхьэурэ къащепсалъэкIэ? Нэхъ ди гъунэгъу тхыдэмкIэ дыкъэIэбэжынщи («гъунэгъу» жысIэ щхьэкIэ, ари илъэс минищэ бжыгъэкIэ тпэIэщIэщ), нартхэр къызытекIыжахэми япэрей нартхэми дин яIакъым нэхъапэхуным, сыт щхьэкIэ жыпIэмэ, Тхьэри и лIыкIуэ мелыIычхэри абыхэми яхэтт. Нартхэр къызытекIыжахэми, япэрей нартхэми яухуакъым икIи мыхьэнэ яIэу къалъытакъым дыщэмрэ налкъутналмэсхэмрэ «къакъутэ» иджырей члисэхэмрэ мэжджытхэмрэ. Ахэр дунейм тетащ езыхэр Тхьэм къызэригъэщIар, Тхьэм щыщ Iыхьэу щыт Псэр зэрахэлъыр, абы къарит къарумрэ иIэ мыхьэнэмрэ къагурыIуэу, Тхьэм пыщIэныгъэ хуаIэу. Тхыдэ тхылъхэм, нэгъуэщIу жыпIэмэ, IуэрыIуатэхэмрэ хъыбарыжьхэмрэ, эпосхэм къазэрыхэщыжымкIэ, ар «дыщэ лIыщIыгъуэу» щытащ. Тхьэм, абы и лIыкIуэхэм цIыхухэр хуагъасэт псэукIэ тэмэмым, щIыуэпсым зэрыгурыIуэнумрэ зэрыхэзэгъэнумрэ.

Зауи, бани, укIыгъи, щIэпхъаджагъи щыIэтэкъым. ЦIыхухэр псэут зэгурыIуэмэ зэдэIуэжу, зым Iэпыхур адрейм къищтэжу, псэ зыIут псоми зы бзэ яIурылъу. Ауэ иужькIэ цIыхухэм тхьэпэлъытэу закъыщыхъужауэ жаIэ. Щапхъэ хьэлэмэтщ «нарт» эпосым хэт, Iуащхьэмахуэ теса тхьэпэлъытэхэр: Псатхьэ, Мэзытхьэ, Тхьэгъэлэдж жыпIэми, алыдж Олимпым теса Зевс, Аполлон, Арес, Гермес, Гефест, нэгъуэщIхэр. Ахэр Тхьэтэкъым, атIэ лъэкIыныгъэшхуэхэр зиIэ цIыхут. ИтIани абыхэм щыблэ ягъауэт, уэшх кърагъэшхт, уэс кърагъэст, дунейр уаем зэщIрагъэIулIэт, бгыхэм (вулканхэм) мафIэ къырырагъэхут. «Нарт» эпосым еджахэм пцIы сагъэупсынукъым, апхуэдэ лъэкIыныгъэхэр яIэт нартхэми: Уэрсэрыжь, Сосрыкъуэ, Бэдынокъуэ, Лъэпщ, Сэтэней…

Пэ зиIэм кIэ иIэщ, псори зэгуэрым еух. Тхьэри яхэкIыжу, илъэс минкIэ псэууэ щыта тхьэпэлъытэхэри дунейм щытекIыжым, «дыщэ лIыщIыгъуэри» иухащ. Иужьрей нартхэмрэ цIыху цIыкIухэмрэ я щхьэ унафэм къыхуэнащ. АдэкIэ къэхъуар фIы дыдэу къеIуатэ «Бабылей (Вавилон) чэщанэм» теухуа хъыбарыжьым. Тхьэм цIыхухэр зэрызэпсалъэу щыта бзэр «зэхитхъуэри», уафэм нэса чэщанэри зэхэлъэлъэжащ. «УхуакIуэхэр» зэгурымыIуэж щыхъум, гуп-гупурэ, лъэпкъ-лъэпкъыурэ загуэшыжри я зэхэтыкIэрэ я бзэрэ, я дин къагъэщIыжащ. Дини тхьэлъэIуи нэхъапэхуным зымыщIа нартхэм я тхьэ унэхэр къызэIуахащ, абыхэм къыщIагъэтIысхьэжащ къардэн щоджэнхэр. Тхьэм цIыхур къигъэщIри, хуитыныгъи къритащ зыхуейр ищIэну, зэрыхуейуэ псэуну. Тхьэм пыщIэныгъэ хузимыIэж цIыхухэм а хуитыныгъэр тэрэзу къагъэсэбэпакъым. Дэтхэнэ динми жеIэ цIыхур букIыным нэхъ гуэныхь ин щымыIэу («ЦIыхум и гъащIэр Iизыхыжыр ар къезыта Тхьэращ…»). Ауэ, итIани, тхыдэ кIыхьагъым дин зауэ дапщэ екIуэкIа? Жорзехьэхэм я зауэ зекIуэхэр «походы крестоносцев») фигу къэвгъэкIыжыт.

Муслъымэн шиитхэмрэ сунитхэмрэ зэрызэгурымыIуэр – щэ? Сэ фIы дыдэу сощIэж лIыщIыгъуэ кIуам и 80-нэ гъэхэм екIуэкIа иракиран зауэр. Ираныр шиит къэралщ, Иракым щопсэу шиитхэри сунитхэри, ауэ илъэсий зауэр щекIуэкIам, Иракым и къэрал унафэр яIэщIэлъащ сунитхэм. Сэ апщыгъуэм сыщы лажьэт «Ленин нур» газетым, икIи къытездзауэ щытащ а зауэм теухуа аналитикэ тхыгъэ. Абдежым щызгъэуват мыпхуэдэ упщIэхэр: «Алыхьым щхьэ зэригъэзауэрэ зы муслъымэн диныр зезыхьэ шиитхэмрэ сунитхэмрэ?», «Муслъымэнхэм я напэр адрей динхэм я пащхьэм щхьэ щызытрахыжрэ?»… Нобэр къыздэсым, илъэс пщIы бжыгъэ хъуауэ, увыIэмэ щIадзэжурэ, индус Индиемрэ ислъам Пакистанымрэ Кашмир щIыналъэр яхуэмыгуэшу зозауэ, зэроукI. Блаватская Еленэ и дежкIэ згъэзэжынщи, абы и къалэмым къыщIэкIа лэжьыгъэхэм къызэрагъэлъагъуэмкIэ, зэгуэрым цIыхухэр псэуащ зы бзэ яIурылъу, къэзыгъэщIа Тхьэм и пащхьэ зэритым, абы жиIэхэр зэрагъэзащIэм къыхэкIыу, дини зэрамыхьэу, члиси, мэжджыти, нэгъуэщI тхьэелъэIупIи ямыухуэу.

Дэ иджы ди нэкIэ долъагъу, дрищыхьэтщ цIыхуцIэ зиIэр зэрызэгурыIуэн зы бзэ зэрылъыхъуэм. ИджыкIэ апхуэдэ Iэмалу нэхъыбапIэм къагъэсэбэп инджылызыбзэр. Ауэ зэгуэрым цIыхуцIэ зиIэр хуэкIуэжынущ бзэ лъэпкъ хэмыту гупсысэхэмкIэ зэхъуэжэным (телепатия), сензарымкIэ е нэгъуэщIыбзэкIэ Тхьэм зэпыщIэныгъэ занщIэ хуагъуэтыжыным. Тхьэм къигъэщIахэр зы жылагъуэ хъужынурэ, зы дини ягъуэтыжынущ. Ауэ нэхъапэу икIи нэхъыщхьэу щытынур динракъым, атIэ цIыхухэм Тхьэр зэращымыгъупщэращ, ар ягу зэрилъ зэпытращ, абы пыщIэныгъэ зэрыхуаIэращ, абы и хабзэхэр зэрагъэзащIэращ. Мы тхыгъэм арэзы къытемыхъуэнухэри, ар зигу къыщIимыубыдэнухэри, къызыгурымыIуэнухэри щыIэщ. Ауэ абы хэлъщ уи акъылкIэ, уи псэкIэ зэбгъэзахуэ, псоми къагурыIуэ бзэмкIэ пIуатэ хъуну гупсысэхэр. ЩIэджыкIакIуэхэр фи еплъыкIэмкIэ фыкъыддэгуашэми лей хъунукъым.

ДЭБАГЪУЭ Хьэтызэ