БлэкIар пщызымыгъэгъупщэ

Черкесск къалэм  дэт, зи №11 егъэджэныгъэмкIэ купсэм къыщызэIуахащ Совет Союзым и ЛIыхъужь КЪАРДЭН Мурат Iэсхьэд и къуэм и фэеплъыр зыгъэщыпкъэ «ЛIыхъужьым и партэ»-р. Ди хэкуэгъу цIэрыIуэм къызэпича гъащIэ гъуэгуанэм ириплъэжащ а IуэхуфIым епхауэ кърахьэжьа дауэдапщэм хэтахэр — Къэрэшей-Черкесым и ЦIыхубэ ЗэIущIэм (Парламентым) и депутатхэр, жылагъуэ Iуэхузехьэхэр, Росгвардием, МВД-м я лIыкIуэхэр, Къардэн Мурат ипхъу Людмилэ, абы и къуэ Олег, купсэм щеджэ и пхъурылъхупхъу цIыкIухэр, егъэджакIуэхэмрэ еджакIуэхэмрэ

«Мурат хуэдэ щIалэ щыпкъэ адыгэм къызэрытхэкIам ироин, ирогушхуэ и лъэпкъэгъуу хъуар. Нобэ мы Iуэхугъуэм къыхаша сабийхэм я бгъэм хэлъщ Хэку зауэшхуэм хэта я нэхъыжьхэм я сурэтхэр, ахэр зыкъэмынэу дэркIэ лIыхъужьщ.

Зауэм и гуIэр, и хьэлъэр зымышэча лъэпкъи, унагъуи щыпсэууэ къыщIэкIынкъым ди хэгъуэгум. Си гуапэ дыдэщ нобэ мыпхуэдэ Iуэхугъуэ щхьэпэм сыхэтыну, ди блэкIамрэ ди фIымрэкIэ щIэблэм садэгуэшэну зэрыслъэкIыр», — жиIащ республикэм и Адыгэ Хасэм и тхьэмадэ, КъЧР-м и цIыхубэ зэIущIэм  и депутат Аслъэнхэ Алий. «ЛIыхъужьым и партэ» Урысейпсо хэкупсэ проектыр 2018 гъэм щегъэжьауэ «Зыуэ щыт Урысей» партым егъэлажьэ. «Дэ ди еджапIэмкIэ щIыхьщ икIи жэуаплыгъэ инщ Совет Союзым и ЛIыхъужь Къардэн Мурат теухуауэ дауэдапщэ едгъэкIуэкIыныр. Абы и унагъуэм и фIыщIэкIэ, нобэ фэеплъ дауэдапщэ къызэдгъэпэщауэ, ди зауэлI хахуэм фронтым къыщигъэлъэгъуа лIыхъужьыгъэр ди еджакIуэхэм иджыри зэ ягу къыдогъэкIыж, ауэрэ езыхэри къыхудоджэ IуэхуфIхэр лэжьыным, Хэкур фIыуэ лъагъунымрэ абы и тхыдэр хъумэнымрэ.

ИкъукIэ дыфхуэарэзыщ хьэрычэт фщIыуэ мы Iуэхур къызэрыддефхьэжьам, фи нэхъыжьым и фэеплъыр къызэрыддэвгъэлъапIэм папщIэ. Нобэ къызэIутха партэр нагъыщэ къудейкъым, атIэ — ар тлъытэ хъунущ еджапIэм и гъэсэныгъэ къэухьым и зы Iыхьэу», — жиIащ егъэджэныгъэ Купсэм и унафэщI Ляшовэ Еленэ.

Урысей Федерацэмрэ Къэрэшей-Черкесымрэ я гимнхэр, еджакIуэхэм я творческэ зыкъэгъэлъэгъуэныгъэхэр, хэкупсэ уэрэдхэмрэ усэхэмрэ щыкуэдт Къардэн Мурат и фэеплъ пшыхьым. Ди лъэпкъэгъум хэлъа лIыгъэр ену игу илъынущ ди хэгъуэгум и цIыхубэми, абы и цIэкIэ къызэIуаха партэм пэрысыну щIэблэми.

Зэрыгушхуэ и гукъэкIыжхэмкIэ къызэхуэсахэм ядэгуэшащ Мурат и пхъурылъхум и пщащэ, Купсэм щеджэ Куликовэ Эммэ. Гум дыхьэ усэ телъыджэ къеджащ Эммэ и шыпхъу нэхъыщIэ цIыкIу Никэ. ЗэIущIэм и кIэм ехъулIэу, псори къэтэджри дакъикъэкIэ яхуэщыгъуащ ТекIуэныгъэ Иным зи псэр щIэзытахэм. «ЛIыхъужьым и партэр»къызэIухыныр еджапIэ гъащIэмкIэ мыхьэнэшхуэ зиIэ къэхъугъэщ, ар лъэбакъуэщIэщ тхыдэ фэеплъыр хъумэнымрэ къыдэкIуэтей щIэблэм гъэсэныгъэ тэрэз иIэу, и Хэкур, и унагъуэр ихъумэжыфу лъэ быдэ тегъэувэнымрэкIэ.

Парт проектым и къалэнщ — Хэкум и тхыдэм, къэралым и блэкIам, абы и куэщI къитэджыкIа цIыхушхуэхэм пщIэ хуащIу еджакIуэхэр гъэсэныр.

Къардэн Мурат ипхъу Людмилэ гукъэкIыж жыжьэхэм игъэзэжкIэрэ щIэблэм защыхуигъазэм жиIащ: «Ди адэм зэи фIэфIакъым зауэм тепсэлъыхьыну. Нобэ хуэдэу сощIэж, Олег ещанэ классым щеджэу, Хэкум и хъумакIуэм и Махуэм еджапIэм щызэхашэ дауэдапщэм и дадэр ишэу, зауэм къытригъэпсэлъыхьыну елъэIум, къызэрыхуимыдар. «Си щIалэ, абы нэхърэ, дытегъэпсэлъыхь мамырыгъэм, ин ухъумэ къыхэпхыну узыщIэхъуэпс IэщIагъэм. Зауэр — ар шынагъуэщ, нэпсщ!» — къыжриIат.

ЛЫХЬ Тимур