«Апхуэдэ щыIэкъым»

Творческэ лъэкIыныгъэхэр гъэунэхунымкIэ, кино кIэщI цIыкIухэр техынымкIэ Ищхъэрэ-Кавказ федеральнэ хэгъуэгум щекIуэкIа «АртМастерс» Лъэпкъ чемпионат зэIухам хэта проект гъэщIэгъуэнхэм я нэхъыфIу къалъытащ режиссёр цIэрыIуэ ЕмкIуж Андзор и «КавказФильм» компанэм трихын и мураду утыку ирихьа, «Так не принято» зи фIэщыгъэцIэ кинопроектыр. ИкIи, абы уасэфI зэрыхуащIам и мызакъуэу, лэжьыгъэм и ужь ихьэри техын Iуэхухэр щIэх-щIэхыу зэфIагъэкIащ, къалэ зыбжанэми къыщагъэлъэгъуэжащ.

«Так не принято» кином япэу еплъахэм ящыщщ Москва, Черкесск, Налшык къалэхэм щыпсэухэр. Къэрэшей-Черкесым и къалащхьэм ар къыщагъэлъэгъуащ Даур Аслъэн и цIэр зезыхьэ, щэнхабзэмрэ гъуазджэхэмрэкIэ колледжым и концерт пэшым.
«ГъащIэм къыщыхъуа Iуэхугъуэм пэджэжу траха метражкIэщI художественнэ фильмым гъунэгъу ухуещI гъуазджэ нэсымрэ СКФО-м щыщ щIалэгъуалэ зэчиифIэхэм я лэжьыгъэмрэ», — щыжаIащ КъЧР-м щэнхабзэмкIэ и Министерствэм.
ЕмкIуж Андзор къызэрыджиIамкIэ, «Так не принято» кинор теухуащ унагъуэм илъыпхъэ зэгурыIуэныгъэм, хэхъуэм, зи нэчыхь тха нэрыбгитIыр зэлэжьыжу, зэгурыIуэрэ зэдэIуэжу загъэпсу, сабий зэрызэдагъуэтын хуейм, унагъуэ насыпыр хъулъхугъэм е бзылъхугъэм и закъуэ елъытауэ зэрыщымытым.
— Зы цIыху щыIэкъым псом нэхърэ нэхъ захуэуи, зэи щымыуэуи. Щыуам IэщIэщIар къыгурыIуэжу зэригъэзэхуэжмэщ абы къыдэгъуэгурыкIуэ щхьэгъусэм къыщыдиIыгъыфынур, дэIэпыкъуныгъэри зэгурыIуэныгъэри я жьэгу щимыкIынур. Мис а гупсысэхэр, щIалэгъуалэм къинэмыщIа, нэхъыжьхэми я щхьэм нэтхьэсыфынкIэ дыгугъэу, гъэсэныгъэ зыхэлъ кино дгъэхьэзыращ. Абы иджыпстукIэ хуиту дэни ущеплъыфу щыткъыми, дыкъагъэгугъащ куэд мыщIэу Okkо, KION жыхуиIэ интернет-кинотеатрхэм къралъхьэну.
«АртМастерс» зэпеуэм кинор дакъикъэ 15-м къриубыдэу тетхын хуейуэ къытхуигъэувати, къэдгъэлъэгъуэну дызыхуеяр а зэман мащIэм къредгъэубыдэфауэ къысщохъу. Гугъущ апхуэдэу зэман кIэщIкIэ сюжет псо нэгъэсауэ зэпкърыпхыныр, ауэ зэрыхъукIэ наIуэ тщIащ ди мурадар», — къыддэгуэшащ ЕмкIуж Андзор.
Мыбдеж къыщыхэгъэщыпхъэщ «Так не принято» кином и роль нэхъыщхьэхэр щызыгъэзэщIа актёрхэр Къэрэшей-Черкесымрэ Къэбэрдей-Балъкъэрымрэ зэрыщыщыр. Ахэр абазэ къэрал драмэ театрым щылажьэ, КъЧР-м щIыхь зиIэ и артист Хъупсырджэн Зураб, КъБР-мрэ Ингушетиемрэ щIыхь зиIэ я артист Хьэщэ Къанщобий, къэбэрдей къэрал драмэ театрым и артисткэ Хьэткъуэ Дианэ сымэщ. Сабий ролыр игъэзэщIащ Къардэнхэ Айхъан.
— Кином хэта дэтхэнэми си гур игъэзагъэу джэгуащ. Къанщобийрэ Дианэрэ сцIыхут, садэлэжьат заулрэ, ауэ Зураб зэи Iуэху дэсщIатэкъыми, ди япэ лэжьыгъэр тIуми къыдэхъулIауэ солъытэ. Тхьэр арэзы къахухъу псоми, я IэщIагъэкIэ нэхъри иригъэфIакIуэ, — къыщIигъужащ режиссёрым.
ЛЫХЬ Тимур