АДЫГЭ – ХЬЭБЛЭ къуажэм и курыт еджапIэр къэзыухахэм ягъэпэжащ ерыщу зэрылэжьар, адэ – анэр къазэрыщыгугъар, егъэджакIуэхэм къыбгъэдалъхьа щIэныгъэр. «Ди гуапэу хъыбар фыдогъащIэ ди ныбжьыщIэхэм ЕГЭ-мкIэ балл лъагэхэр къызэрахьар. Апхуэдэу, Хъупсырокъуэ Белэ химиемкIэ балл 82-рэ, Дэхъу Заур урысыбзэмкIэ — 97-рэ, химиемкIэ – 93-рэ, Крымов Аслъэн химиемкIэ – 90, Джемакулов Руслан химиемкIэ – 82-рэ къахьын яхузэфIэкIащ. Фи ехъулIэныгъэхэр – аттестатым и гъэлъэгъуэныгъэ къудейкъым. АтIэ, ар ехъулIэныгъэкIэ гъэнщIа къэкIуэнышхуэм и щIэдзапIэщ. Ди псэм къыбгъэдэкIыу еджапIэр къэзыухахэм къэралым и еджапIэ нэхъыфIхэм фыщIэтIысхьэну дывохъуэхъу! Фи студент гъащIэр нэхуу икIи гъэщIэгъуэну щрет. Ди фIэщ мэхъу ди щIыналъэм и къэкIуэнур зыухуэнури, хэку цIыкIур зыгъэлъэпIэнури фэрауэ зэрыщытыр. Къуажэдэсхэр фэркIэ мэгушхуэ! Фи ехъулIэныгъэр — псоми ди зэхуэдэ текIуэныгъэщ!», — щатхащ социальнэ зэпыщIэныгъэхэм районым егъэджэныгъэмкIэ и Управленэм къыбгъэдэкIыу.
Ерыщагъым къыпэкIуэ щIыхьыр
ЕхъулIэныгъэм хуэкIуэр зыхуигъэувыжа мурадым ерыщу пылъращ, къимыкIуэтращ. Апхуэдэхэм ящыщу зи цIэ къиIуапхъэу къытщохъу Адыгэ-Хьэблэ къуажэм дэт курыт еджапIэр иджы дыдэ къэзыуха ДЭХЪУ Заур. Мы ныбжьыщIэм хэлъ ерыщагъымрэ и тегушхуэныгъэмрэ я фIыгъэкIэ, хузэфIэкIащ къэзыпщытэж экзаменхэм — ЕГЭ-мкIэ нагъыщэфIхэр къигъэлъэгъуэн. Апхуэдэуи, урысыбзэмкIэ —балл 97-рэ, химиемкIэ — 93-рэ къихьащ.
Мы бжыгъэхэм къагъэлъагъуэ Заур бгъэдэлъ щIэныгъэ куур. ЕгъэджакIуэхэмрэ къыдеджахэмрэ къыхагъэщ Заур еджапIэм щеджэху хэлъа жэуаплыгъэмрэ гъэсэныгъэмрэ. Абы и ехъулIэныгъэр, шэч хэмылъу, еджапIэм щIэс псоми щапхъэ уасэншэ яхуэхъунущ. ЕГЭ-м и ехъулIэныгъэфIхэр — Заур и IэщIагъэ гъуэгум и щIэдзапIэ къудейщ. ЩIалэм къыпэщылъщ еджапIэ нэхъыщхьэм щIэхьэжыныр, и гум ириубыда мурадхэм хуэкIуэныр… Дрогушхуэ, адыгэ щIэблэм къыхэжаныкI мыпхуэдэ ныбжьыщIэхэм. Дэхъу Заури, нэгъуэщIу, щIэныгъэфI экзаменхэм къыщызыгъэлъэгъуа ныбжьыщIэхэми я еджэнымкIэ, я гъащIэ гъуэгуанэмкIэ ехъулIэныгъэ яIэну дахуохъуахъуэ!
Зыгъэхьэзырар САНЭШОКЪУЭ Ренатщ
Больше на Черкес хэку
Подпишитесь, чтобы получать последние записи по электронной почте.
