Хахуагъэмрэ къалэным хуэпэжынымрэ ятеухуа хъыбарщ нобэ къыфхуэтIуэтэнур. Уегупсысмэ, ди тхыгъэр зытеухуа пщащэм зауэлI теплъэр зыкIи епхьэлIэфынукъым. Арами, гъащIэм къыщохъу узыщымыгугъа къэхъукъащIэхэри.
Коста-Хетагуровэ жылагъуэм щыщ пщащэ IэдэбыфIэм, хьэл-щэн зэпIэзэрыт зыхэлъым хахуагъэ къызыкъуихри, зауэ операцэ хэхар здыщекIуэкI щIыпIэм къулыкъу щищIэну кIуащ. Ар абы хыхьащ зауэ медик-фочауэу.
ХАПАЕВЭ Альбинэ къихъухьащ икIи щапIащ къэрэшей-осетин унагъуэм. ЕджапIэм щыщIэсым, шэрыуэу фоч гъэуэнымкIэ зэчий зэрыбгъэдэлъым егъэджакIуэхэмрэ и классэгъухэмрэ гу лъатат. ЕджапIэ нэужьым, пщащэр щIэтIысхьащ Карачаевск къалэм дэт МОКСУ-м и сестринскэ къудамэм. Ар къиухри, хирургиемкIэ медсестрауэ лэжьэн щIидзащ.
СВО-м кIуэну, Урысейм зыхъумэжыныгъэмкIэ и Министерствэм контракт дищIыну абы игу къэкIащ зауэ операцэ хэхар щыщIидза махуэм щегъэжьауэ.
«Нобэ абдежщ сыздэщыIэпхъэр, зауэр здыщекIуэкI щIыпIэращ. УIэгъэ хъуа ди зауэлIхэр къезгъэлын, абыхэм защIэзгъэкъуэн хуейщ», — егупсыст ар.
Апхуэдэ мурад зэрищIар куэдрэ зыми яригъэцIыхуакъым. Пщащэм езым и щхьэкIэ таучэл ищIыжащ. Медицинэм и лэжьакIуэр хагъыхьащ уIэгъэ хъуахэр зыгъэIэпхъуэ гупым.
Илъэс 21-рэ хъу пщащэр и ныбжьэгъухэр къригъэлын, и къалэнхэр нэсу игъэзэщIэн хьисэпкIэ махуэ къэс и гъащIэм тогушхуэж. Альбинэ нэгъуэщIхэм ящхьэпэн папщIэ, лIыгъэрэ щхьэмыгъэзагъэрэ къызыкъуэзыхым и щапхъэщ.
Пщащэ гуейм дохъуэхъу ТекIуэныгъэр и Iэрылъхьэу и ныбжьэгъухэр, и унагъуэр, абы къыкъуэкIа лIыгъэмрэ хахуагъэмрэ иригушхуэхэр къыздежьэ и унагъуэм къигъэзэжыну!
Альбинэ, уэри, Хэкур зыхъумэну зыкъэзыIэта ди хэкуэгъухэми дрогушхуэ. Фи лIыхъужьыгъэр гулъытэншэу къэнэнукъым, дэри фи лъэбакъуэ къэс зыфщIэдгъэкъуэнущ.
Фи къулыкъур тыншу ефхьэкIыну, фи текIуэныгъэмрэ фи унагъуэхэм фыкъыщихьэжыну махуэмрэ тхьэм къигъэгъунэгъу!
Зыгъэхьэзырар ЕЗАУЭ Маринэщ
