Зауэ операцэ хэхар щекIуэкI щIыпIэхэм ди хэгъуэгум икIыу кIуа ди щIалэхэм жыIэщIэу, щхьэмыгъазэу, лIыгъэ яхэлъу, къыхуагъэув къалэнхэр псынщIэу, гъэтIысауэ зэфIэзых зауэлIу зыкъыщагъэлъагъуэ. Апхуэдэу зэрыщытым и щыхьэтщ абыхэм къыхуагъэфащэ къэрал нагъыщэхэр.
Апхуэдэу зауэ операцэ хэхар щекIуэкI щIыналъэм щызэрихьа лIыхъужьыгъэмкIэ къыхагъэщащ ди хэкуэгъу ДЖЕМАКУЛОВ Ислъам Мурат и къуэр. Хэкур ихъумэкIэрэ, ди къэралым и хьэлэмэт зэрихуэкIэрэ, зэрихьа лIыхъужьыгъэмрэ гуеигъэмрэ къыхэкIыу, «За боевые заслуги» медалыр къыхуагъэфэщащ.
Ар Адыгэ-Хьэблэ къуажэм къыщыхъуащ. Зауэ операцэ хэхар щыщIидза махуэм щегъэжьауэ, СВО-м хэтщ. Ислъам лIыгъэшхуэ зыхэлъ, къалэнхэм ерыщу пэщIэт лIыхъужьу зыкъегъэлъагъуэ.
ЗауэлIым жеIэ къэралым и гъунапкъэхэм бийр къыщебгъэрыкIуа зэман хьэлъэм Хэкур хъумэныр дэтхэнэ цIыхухъуми и къалэну зэрыщытыр.
— Хэкум къулыкъу хуэщIэным къикIыр — уи къэралым, уи унагъуэм и хъумакIуэу укъэувынращ, ди адэжьхэм я пщIэр хъумэнращ. ТекIуэныгъэр дыдеинущ! — жеIэ Джемакуловым.
Ислъам подразделенэм и командирщ, къыхуагъэува къалэнхэр зэфIэхынымкIэ гупыр хьэлэмэту къызэригъэпэщащ. Ар и нэIэм щIэт зауэлIхэм, и къулыкъу лэжьы-гъэм жэуаплыгъэ пылъу зэрыбгъэдыхьэр и гъусэхэм жаIэ.
